Un camión envorca na AP-9 á altura de Ordes e obriga a cortar un carril

Imaxe: TVG

Un camión envorcou na mañá deste mércores na autoestrada AP-9, á altura do quilómetro 47, no termo municipal de Ordes, provocando incidencias na circulación en dirección á Coruña.

O accidente produciuse arredor das 06:30 horas, cando o vehículo pesado envorcou por causas que polo momento se descoñecen.

A consecuencia do sinistro, foi necesario cortar o carril esquerdo da autoestrada, mentres que o dereito permaneceu aberto ao tráfico. Segundo as primeiras informacións, o condutor do camión resultou ileso.

Ás 08:42 horas, o carril esquerdo continuaba cortado, aínda que non se rexistraban retencións importantes.

Recoméndase aos condutores que circulen pola zona extremar a precaución e prestar atención á sinalización.