Teo garda un minuto de silencio polo 29º aniversario do secuestro e asasinato de Miguel Ángel Blanco

• O acto estivo presidido pola alcaldesa, Lucía Calvo de la Uz, e o presidente do Parlamento de Galicia, Miguel Santalices, ademais de varios deputados, concelleiros do equipo de Goberno de Teo e do Partido Popular de Santiago, traballadores municipais e veciños.
• Tras a lectura dun manifesto, levouse a cabo un minuto de silencio e unha sentida ovación en lembranza de todas as vítimas do terrorismo.

Teo, 13 de xullo de 2026.- O Concello de Teo rendeu esta mañá unha sentida homenaxe con motivo do XXIX aniversario do secuestro e asasinato de Miguel Ángel Blanco. O acto estivo presidido pola alcaldesa, Lucía Calvo de la Uz, e o presidente do Parlamento de Galicia, Miguel Santalices. Tamén asistiron varios deputados, concelleiros do equipo de Goberno de Teo e do Partido Popular de Santiago, traballadores municipais e veciños.

A alcaldesa salientou que “recordar a Miguel Ángel Blanco é unha obriga moral para coa nosa sociedade”, pois cómpre recordar a todas as vítimas. “Queremos enviar todo o noso afecto e solidariedade para a súa familia e para as máis de 850 vítimas a mans da banda terrorista ETA”.

Tras as palabras de ambos dirixentes, o concelleiro teense de Servizos Sociais e Relacións Veciñais, Juan Jesús Cerqueiro, procedeu á lectura dun manifesto onde se lembraba que preto de dous millóns e medio de persoas participaron en algunha das manifestacións convocadas en toda España durante aqueles días de xullo de 1997. Un manifesto que salienta que a xustiza non se pode negociar nin pode ser moeda de cambio en ningún pacto de goberno e que esquecer ou manipular a historia, relativizar ou branquear o terrorismo é perverter a democracia que ampara e humillar ás vítimas.

Logo da lectura do manifesto, procedeuse a un sentido minuto de silencio, non só en recordo da figura de Miguel Ángel Blanco senón por todas aquelas vítimas do terrorismo do noso país. O acto pechouse cun efusivo aplauso.