Comezan as Festas da Guadalupe en Rianxo con cobertura especial de Radio Líder

O programa das Festas da Guadalupe desenvolverase do 13 ao 20 de setembro. Este ano, as festividades contarán novamente coa colaboración da Moreniña e do Concello, con diversos actos institucionais como o Día de Padrón, o Día das Persoas Maiores ou a Procesión Marítima.

As actividades comezarán o 13 de setembro co tradicional chupitaso ás 0.00 horas, despois do pregón a cargo de Adrián Mosquera e a chegada do facho olímpico do atleta rianxeiro. A festa continuará coa celebración dos 80 anos (ás 22.00) con Virtual Project Cover Band, seguidos por Abi Pinchadiscos (á 1.00) e Bruno Deejay (ás 3.30).

O sábado 14, o programa inclúe actuacións da Banda de Vilatuxe e Trécola ás 10.00, Fogo Fatuo ás 19.00 e Louband ás 20.00. Haberá tamén unha ruta cicloturista desde a praza de Castelao ás 10.00, un escape room na praza de Manuela ás 11.00, e unha sesión vermú con La Ola ADN ás 14.00. Ás 19.30 terá lugar unha novena con ofrenda na capela da Guadalupe e ás 20.00 un certame de corais no Auditorio. A verbena nocturna (a partir das 23h) contará con La Ola ADN, Grupo Bianco, a Escola de Música de Rianxo, Manu X e Bruno Deejay.

O domingo 15 comezará con dianas e alboradas da Banda de Música de Arca e da Banda de Gaitas Buxaina de Taragoña. Ás 12.00 celebrarase unha misa solemne na capela da Guadalupe coa Coral Abraira e unha alfombra floral por Alfombristas de Rianxo. Ás 13.00 terá lugar a procesión marítima e ás 20.00 actuará Vai de Roda na praza Virxe de Guadalupe. Pola noite, a verbena contará con Players e Finisterre, e ás 00.00 haberá un espectáculo de drons luminosos.

O luns 16 comezará cunha alborada da Banda Cultural de Arcade e xogos das Juadalupeñas na praza de Castelo (11.30). Ás 14.00 haberá unha sesión vermú con Fuego e ás 15.00 un xantar popular no parque da Martela. Ás 18.00 terá lugar o Festivaliño e ás 20.00 cantos populares na praciña. Pola noite, actuarán Fuego e Kubo.

O martes 17 incluirá un concurso infantil de debuxo na rúa de Abaixo, sesión vermú con Os Festas e Solara, e obradoiros e demostracións de cultura urbana nos xardíns da Ribeira. Ás 18.30 comezarán as actividades de irmandade coa vila de Padrón, con recepción de autoridades e un concerto coa Banda Municipal de Padrón. Ás 20.00 actuará a Fanfarria Furruxa e pola noite, Solara e a Banda Gaudí.

O mércores 18 haberá xogos na praza da Manuela (Xogando Miudiño) e sesión vermú con Nunca é Tarde e Trío Alborada. Ás 15.00 comezarán as homenaxes aos maiores co Xantar de Confraternidade e baile. Ás 16.30 arrincará a Feira do Circo no parque da Martela e ás 20.00 a Charanga Santa Compaña ofrecerá unha ruada. A verbena contará con Satélites e América de Vigo.

O xoves 19 celebrarase o Feirón Mariñeiro (A Feira do 1924) nas rúas do centro histórico. Ás 12.00 actuará Cé Orquestra Pantasma e ás 14.00 o Trío Alborada. Ás 21.00 haberá Noite Folc con Os Campantes da Baña, As Rianxeiras da Covecha, Galega de Bailables e Maruxa e Coralia. A verbena nocturna contará con Cinema e Gran Parada.

Finalmente, o venres 20 será o día infantil, con xincana inchábel na praza Virxe da Guadalupe, festa da escuma na praza de Castelao (ás 13.00) e sesión vermú con Mar de Arousa. Pola noite, a gran verbena contará con Mar de Arousa, Saudade e Charleston Big Band, e tamén haberá unha verbena infantil nos xardíns da Ribeira (ás 23.00) con As Máis Molonas de Pakolas. Ás 2.00 horas, a festa rematará cunha gran traca final coas bengalas e o canto colectivo de A Rianxeira.

Radio Líder Santiago realizará unha cobertura especial destas festas, cun programa en directo desde a vila e reportaxes dos actos máis destacados.