Un tapeo de salmón abrirá o apetito na Estrada antes da gran festa do 17 de maio

• As Tapas do Salmón serviranse os días 8, 9 e 10 de maio, a un prezo de 3 euros.
• Os 15 locais estarán identificados cun vinilo no que figurará a súa tapa.
• Poranse á venda anticipada 3.000 tíckets para a degustación do 17 de maio.

Co arranque de maio, chega o mes do Salmón á Estrada. Avanzando cara a 52ª edición da festa gastronómica por excelencia do municipio estradense, veciños e visitantes terán o vindeiro fin de semana a oportunidade de catar unha quincena de propostas culinarias dos restauradores locais, suxestións que permitirán abrir boca de cara á degustación popular do día grande da festa, o domingo 17 de maio.

As xornadas de “tapeo” do Salmón serán os días 8, 9 e 10 de maio. A diferenza das Santas Tapas, non seguirán un formato concurso. Os locais participantes (15 en total) estarán identificados cun vinilo nos seus establecementos, no que figurará a súa tapa e a correspondente información en materia de alérxenos.

Os participantes serán: Samaná, Cepa e Viño, As 3 Portiñas, Argentinos Burguer, Velis Nolis, Malo Será, Enredo, A Lacena de Chucha, O Candil de Silvia, Andalucía, Eureka, Oasis, O’Lar, Os Peares e Inferno. Todos eles ofrecerán nos días indicados as tapas de salmón a un prezo de 3 euros.

A organización fixou un horario mínimo de degustación, que poderá ser ampliado a criterio e elección de cada local. O venres 8 serviranse estas tapas de 20.00 a 22.00 horas; o sábado 9 de maio haberá tapas de 13.00 a 15.00 e de 20.00 a 22.00. O domingo 10 o horario mínimo será de 13.00 a 15.00.

Sorteo

Ademais, secundar estas xornadas pode traer premio. Por cada unha que se probe entregarase un boleto para participar nun sorteo de dous vales, un de 300 euros e outro de 150. As papeletas deberán depositarse nos lugares indicados e o sorteo realizarase o 14 de maio.

As tapas que presentará cada un dos participantes son as seguintes:

• ANDALUCÍA: Tosta de dous salmóns.
• EUREKA: Mel de dragón.
• ENREDO: Arroz fusión de salmón.
• INFERNO: Inferno no mar.
• MALO SERÁ: Salpicón de salmón e gambas.
• OS PEARES: Salmón con arroz negro e cogomelos.
• O LAR: Futo frito con maionesa de kimchi.
• ARGENTINOS BURGUER: Salmón Deep Fried Sandwich.
• OASIS: Timbal de salmón.
• O CANDIL DE SILVIA: Fajita de salmón.
• CEPA E VIÑO GASTROBAR: O xardín escandinavo.
• SAMANÁ: Nigiri de salmón mariñado con kimchi, salsa inglesa e mel.
• A LACENA DE CHUCHA: Doce engano.
• AS 3 PORTIÑAS: Petisco de salmón e requeixo.
• VELIS NOLIS: Gilda de salmón.

Co arranque destas xornadas comezará tamén a venda anticipada dos tíckets para a degustación popular do 17 de abril, o propio día da LII Festa do Salmón. Neste caso o prezo da ración será de 4 euros.

A organización recomenda facerse antes con estes tíckets para evitar colas o día da celebración e tamén para permitir valorar se fose preciso ampliar o número de pinchos reservados para o evento gastronómico por excelencia do calendario estradense.

Poranse á venda anticipada 3.000 tíckets, coa previsión de servir unhas 5.500 racións nunha degustación que contará con 18 establecementos participantes.