Val do Dubra impulsa unha petición conxunta para mellorar a conexión entre Bergantiños, Xallas, Santiago e Barbanza

Val do Dubra, 8 de xuño de 2026. O Concello de Val do Dubra remitiu unha carta para iniciar unha rolda de contactos cos municipios da área de influencia da vía que conecta as comarcas de Bergantiños, Xallas, Santiago e Barbanza co obxectivo de impulsar unha petición institucional conxunta para mellorar esta infraestrutura estratéxica.

A iniciativa xorde ante a preocupación compartida polo elevado volume de tráfico que soporta esta conexión, especialmente no núcleo de Portomouro, onde conflúen varias estradas autonómicas e provinciais. Segundo os datos recollidos na comunicación remitida aos concellos, por este punto circulan diariamente máis de 6.000 vehículos, aos que se suman arredor de 500 vehículos pesados.

O Concello de Val do Dubra considera que a configuración actual dos accesos en Portomouro presenta dificultades importantes, especialmente para os camións que realizan desprazamento sentre a comarca de Bergantiños e as vías de comunicación cara á Noia e Barbanza. Esta situación repercute na fluidez do tráfico, na seguridade viaria e na competitividade das empresas da contorna.

Por este motivo, Val do Dubra está promovendo unha solicitude conxunta ante a Deputación Provincial da Coruña e a Xunta de Galicia para que ambas administracións analicen e impulsen as actuacións necesarias que permitan mellorar esta conexión viaria, especialmente nos puntos de maior complexidade e intensidade de tráfico.

Co fin de coordinar esta iniciativa, o Concello tratará de convocar nas vindeiras semanas unha xuntanza cos representantes dos concellos implicados para abordar a situación e tramitar unha proposta conxunta que reforce a petición institucional.

Desde o goberno local sublíñase que esta demanda transcende o ámbito dun único municipio e responde a unha necesidade compartida por todo o territorio, polo que se considera fundamental a colaboración entre administracións para avanzar en melloras que contribúan á seguridade, á mobilidade e ao desenvolvemento económico das comarcas afectadas.