A Garda Civil felicita á Policía Local de Rianxo pola súa colaboración na loita contra o tráfico de drogas

Rafael Romero, xefe da Policía Local de Rianxo, xunto ao alcalde Julián Bustelo | arquivo

A cooperación entre ambos corpos permitiu desmantelar dous puntos de venda de estupefacientes e deter a cinco persoas no municipio

A Garda Civil, a través do Capitán Xefe da Compañía de Noia, trasladou unha felicitación oficial á Policía Local de Rianxo polo labor de colaboración prestado en materia de protección da seguridade cidadá e loita contra o tráfico de sustancias estupefacientes.

Nos últimos meses, axentes da Policía Local participaron en diversos operativos coordinados coa Garda Civil que culminaron co desmantelamento de dous puntos de venda de drogas no termo municipal de Rianxo, un situado no casco urbano e outro na parroquia de Taragoña. Como resultado das actuacións desenvolvidas, procedeuse tamén á detención dun total de cinco persoas relacionadas cos feitos investigados.

Estas intervencións son froito do intenso traballo de vixilancia e seguimento realizado pola Policía Local en diferentes zonas do municipio frecuentadas por consumidores de sustancias estupefacientes. Os axentes intensificaron ademais a súa presenza nas principais áreas comerciais da vila, co obxectivo de reforzar a seguridade e previr a actuación de delincuentes dedicados a furtos e roubos.

Desde o Concello destacan que este esforzo continuado está a dar resultados positivos, contribuíndo á mellora da seguridade cidadá e á tranquilidade da veciñanza. O recoñecemento expresado pola Garda Civil supón, ademais, un respaldo ao traballo diario que desenvolve a Policía Local de Rianxo en coordinación co resto das forzas e corpos de seguridade do Estado.

A colaboración institucional e a coordinación operativa continúan a ser ferramentas fundamentais para facer fronte á delincuencia e garantir unha resposta eficaz ante as ameazas á seguridade pública no municipio.