O programa de emprego do Tambre facilita contratos a 75 dos seus 100 participantes

Xestionáronse 22 prácticas en empresas, impartíronse máis de 350 horas de formación e de 400 sesións de orientación individual que axudaron a mellorar as competencias e abrir oportunidades laborais

Un centenar de menores de 30 anos, mulleres desempregadas e inmigrantes participaron nesta edición da iniciativa, financiada pola Consellería de Emprego, Comercio e Emigración da Xunta de Galicia e o Servizo Público de Emprego Estatal

Santiago de Compostela, 23 de outubro de 2026 (Vía Láctea Comunicación).- A Asociación Área Empresarial do Tambre finaliza o vindeiro luns, 26 de outubro, a última edición do Programa Integrado de Emprego de Galicia 2025/2026, financiado pola Consellería de Emprego, Comercio e Emigración da Xunta de Galicia e o Servizo Público de Emprego Estatal (SEPE).

No programa, destinado a fomentar a promoción da inserción laboral e a creación de novas oportunidades profesionais na comunidade, participaron 100 persoas menores de 30 anos, mulleres desempregadas e inmigrantes. Segundo o balance da convocatoria, *75 persoas conseguiron un contrato laboral e 54 están insertadas laboralmente segundo os criterios do programa.

Impartíronse máis de 350 horas de formación, coa celebración de cursos do sector loxístico, comercio e limpeza, así como formación transversal de prevención de riscos laborais, manipulación de alimentos, primeiros auxilios, habilidades sociais ou introdución á intelixencia artificial, entre outros.

Realizáronse tamén máis de 400 titorías ou entrevistas de orientación individuais para mellorar as competencias e abrir portas aos participantes cara a novas oportunidades no mercado de traballo. Tamén se xestionaron 22 prácticas laborais en empresas e organizáronse talleres de busca de emprego para conectar ás persoas coas empresas locais.

Os participantes puidéronse beneficiar dunha bolsa de asistencia a cursos, tanto presenciais como teleformación, de 10 euros por día.