Arzúa inviste máis de 500.000 € en melloras viarias e instalacións deportivas

• A Xunta de Goberno Local de Arzúa aprobou a proposta de contratación de tres actuacións en pistas das parroquias e adxudicou a reparación das instalacións deportivas

Arzúa 21 de abril de 2026. A Xunta de Goberno Local do Concello de Arzúa aprobou diferentes actuacións destinadas á mellora da rede de pistas das parroquias e das instalacións deportivas municipais.

En total, os acordos adoptados supoñen un investimento de 522.784,43 euros, dos cales 333.039,03 euros corresponden a obras de mellora en pistas municipais das parroquias, mentres que 189.745,40 euros se destinan á reparación das instalacións deportivas.

Reparación das instalacións deportivas municipais

A Xunta de Goberno Local adxudicou a obra “Reparación das instalacións deportivas”, cun investimento de 189.745,40 euros, IVE incluído.

Esta obra xa se atopa adxudicada, polo que o Concello xa conta coa empresa encargada de executar os traballos, unha vez completado o correspondente procedemento de contratación pública.

A obra lévase a cabo a través dun convenio de colaboración entre a Deputación da Coruña e o Concello de Arzúa, polo que a institución provincial financia o 80% do investimento e o Concello achega o 20% restante de fondos propios.

As actuacións teñen como obxectivo corrixir danos derivados do paso do tempo na piscina municipal exterior e no graderío do campo de fútbol, evitando unha maior degradación destas infraestruturas municipais.

Na piscina municipal exterior, os traballos permitirán renovar  o vaso da piscina e elementos da zona perimetral, mellorar o sistema de desbordo, reforzar a impermeabilización e acondicionar o acceso á zona de instalacións.

No graderío do campo de fútbol, a intervención permitirá reforzar a protección fronte á choiva, renovar elementos laterais, reparar a estrutura da cuberta e optimizar a evacuación da auga.

Melloras en pistas das parroquias

No ámbito das parroquias, a Xunta de Goberno Local aprobou a proposta de contratación de tres actuacións viarias orientadas á mellora do firme, da drenaxe e da seguridade en diferentes pistas municipais.

A primeira delas é a obra “Mellora do viario por Desguace, en Bosende” (Parroquia de Calvos), incluída no POS+ Adicional 2/2024, cun orzamento base de licitación de 88.534,44 euros, IVE incluído.

Esta actuación permitirá mellorar unha pista de arredor de 3 quilómetros, así como diferentes zonas de conexión e acceso, coa finalidade de renovar o firme e favorecer unha circulación máis segura e cómoda para a veciñanza.

Tamén se aprobou a proposta de contratación da obra “Reforzo do firme no viario de Santa María á Igrexa de San Salvador” (Parroquia de Santa María), igualmente incluída no POS+ Adicional 2/2024, cun orzamento base de licitación de 60.211,83 euros, IVE incluído.

Neste caso, os traballos permitirán reforzar o firme, mellorar a drenaxe e renovar a sinalización horizontal da pista, contribuíndo á seguridade viaria nesta contorna.

A terceira actuación corresponde á aprobación da proposta de contratación da obra “Reforzo do firme no viario Sisto-Salmonte” (Parroquia de Pantiñobre), incluída no POS+2024, cun orzamento base de licitación de 184.292,76 euros, IVE incluído.

Esta intervención permitirá mellorar o firme, a drenaxe, a sinalización e a seguridade, incluída a colocación de barreiras de protección nun dos puntos previstos.

Coa aprobación destas propostas de contratación, o Concello poderá avanzar na licitación das obras para seleccionar as empresas encargadas da súa execución.

O Concello de Arzúa continuará informando dos avances e prazos destas actuacións, enmarcadas nunha planificación orientada á mellora e mantemento progresivo da rede de pistas municipais e infraestruturas, fundamental para a mobilidade diaria da veciñanza das parroquias e garantir servizos públicos de calidade.